八字喜火的人好八字喜水的人都有什么特点
今天呢本篇文章既内容，灵感来自大师姐白如雪，哎呀！其实唔应该话系灵感，因为，正式黎讲，系我同大师姐倾偈时，大师姐讲既。
如果网友有睇开我写既网文，都知道我同大师姐算几熟，我成日约大师姐食野饮野，虽然有时亦会约大师兄，但因为佢唔似得大师姐，年纪同我咁接近，所以我同大师姐就越来越熟。
我地几个坐埋一齐时，风水﹑八字，占卜﹑面相﹑八卦野﹑天文地理……，乜都会讲。有时大师兄会讲下佢既经验﹑讲下跟师傅白鹤鸣先生咁耐﹑有乜特别心得﹑讲下风水故事﹑讲下趣闻。
大师姐多数会讲下风水八字既见解，讲下佢帮人睇既风水实例。大师兄同大师姐，都的确教识我唔少学问。
有次大师姐讲开八字，就话：「通常八字喜火既人较为著数，八字喜水既人较为蚀底。」当时我听到，都非常好奇，所以立即追问：「点解会咁？」
大师姐反问我：「八字喜火既人，通常喜乜野地支？」基本学理，我谂都唔使谂，就立即答：「巳午未。」大师姐又再问：「八字喜水既人，通常喜乜野地支？」我立即答：「亥子丑。」
大师姐听到，再问我：「通常公司上班时间几时？」咁就难讲，唔同公司唔同噃，我唯有拣个基本答案：「朝九晚五，但间间公司唔一样，朝九晚六、朝八点半晚五点半、朝九晚五点半……」
我仲未讲完，大师姐就打断我既说话：「唔使咁长气，大部份公司一般都朝九晚五或朝九晚六啦。通常，假如工作上有计划要同老板开会﹑见客人，都多数在日间，如果八字喜火既人，早上九时至下午三点，即巳午未火方既时辰，都会旺佢地。
如果八字喜水既人，就要夜晚先会旺佢地。公司相对少晚上先开会或见客，除一些特别行业外，例如开酒吧、娱乐行业、卡拉ok、食店、便利店……。
所以，从呢方面黎讲，喜火会相对好过喜水。日间运气好时，同老板或客人开会，效果会好得多。而喜水既人，多数会唔喜火，咁佢地响日间，同老板或客人相处，关系当然相对差。所以我认为，八字喜火既人比八字喜水既人较为著数。」
我听完，都觉得相当有参考价值，又几有趣，所以写出黎同大家分享。